#Eya

الحكاية تعرفوها..

علاش نحكي فيها؟

علاش رجعت نكتب؟

علاش الحكاية تنسات؟

الحكاية عندها عام..

28 ماي 2014..

ممكن هو عيد ميلاد واحد منكم..

ممكن تاريخ يذكركم بحاجة باهية ولا حاجة خايبة..

و ممكن زادة تاريخ ما يعنيلكم شيء..

قبل 2014, التاريخ هذا ما يعنيلي حتى شيء.. نهار كيما النهارات الأخرين

قاعد نلوج كيفاش نلقى دخلة تليق بالموضوع خاطر نحب كل واحد يبدأ يقرا يكمّل للآخر

ما نحبّكش تكمّل تقرا خاطرنا أصحاب ولا خاطر ممكن نعرفوا بعضنا على تويتر
..كان بديت تكرّز.. ميسالش.. تنجم تسكّر و تمشي على روحك

كانك مازلت هوني و قاعد تقرا, ممكن الحكاية تهمّك و ممكن بعد ما تكمّل تقرا تحس روحك ضيعت شوية من وقتك.

اليوم، نحب نحكيلك على طفلة..

طفلة صغيرة في العمر..

طفلة صغيرة ما قابلتهاش أما حيرتلي برشة مواجع..

آش خلاّني اليوم نكتب عليها..

خاطر حسّيت روحي ما انجم نعمل شيء غير التخنتيب في تركينة..

نكتب باش حكايتها ما تتنساش..

نكتب باش حكايتها ما تعاودش تصير..

نكتب باش إسمها ما يتنساش..

نكتب باش النار معادش تشعل مهما يصير..

ما نحبّكش بعد اليوم تنسى الحكاية اللي باش نحكيهالك..

ما نحبّكش تخلّي حياتك بمشاكلها و روتينها تنسّيك في الحكاية اللي باش نحكيهالك..

ما تنساش.. و ما تسامحش.

ما تسامحش كل واحد طفّى الضو..

ما تسامحش كل واحد قال اللي هي غالطة.. آش لزها..

ما تسامحش كل واحد عمل روحو موش معني بالحكاية..

ما تسامحش كل واحد ضحك و تشمّت..

ما تسامحش اللي جبد بيدون الڨاز و شعّل فيها النار..

 ..و إنت صغير.. حفظوك آيات قرأنية بالسيف
..أنا اليوم، مانيش باش نفرض عليك حتى شيء أما نحبّك تسمع حكاية آية للأخر

و كان حسّيت بوجيعة.. إحسبها حكاية مقدسة و آمن بيها..

تعلّم منها و علّمها لغيرك

أحكي عليها باش ما تموتش

آية ماتت أما حكايتها ما تموتش..

آية..

بنية صغيرة.. تقرا كيف أندادها.. تتعلّم كيفاش باش تعيش حياتها..

بنية صغيرة عندها أحلام كبيرة و ممكن مستقبل كبير..

كيف تكبر، تحب تعمل برشة حاجات في حياتها..

تحب تخدم حاجة تحبها..

تحب تسافر و تعمل برشة تصاور..

تحب تحكي لصاحباتها على طفل تحبو و يحبها..

تحب تعدي معاه حياتها..

تحب تعيش.. و تموت بعد عمر طويل..

عمناول..

نهار اربعاء..

آية مروحة من المعهد.. العام قريب يوفى. آية ناجحة و الصيف على الأبواب..

بحر، سهريات و برشة جو.. و حكايات ممكن تحكيهم نهار آخر لصغارها كان جابت..

آية مروحة من المعهد مع صاحبها اليد في اليد..

آية تحبّو و هو يحبها..

حب متاع صغر.. و مع بعضهم صوروا المستقبل..

من غادي، في طرف الكيّاس، بوها..

شافها..

شافها مروحة من المعهد مع صاحبها اليد في اليد..

شافها فرحانة..

أما هو موش فرحان..

موش فرحان خاطر شاف اللي شرفو.. تمس

خاطر يد بنتو شرف.. تمس

خاطر بوها علموه الشرف بالغالط.. و خاطر الشرف هو راس المال.

مخو تسكّر.. ما عد يشوف و يسمع حتى شي..

اللي علموهولو و حكاوهولو على الشرف.. تمس.

آية.. تبكي و بوها يكركر فيها..

آية.. تبكي و مازالت موش فاهمة شي..

آية.. تبكي و تطلب في السماح من غير ما تعرف علاش..

وصلت للدار..

باش تاكل طريحة..

غدوة باش تمشي تقرا و يدها زرقاء.. و عينها زرقاء.

زعمة يضحكوا عليها صاحباتها؟

زعمة صاحبها يقصها معاها خاطر بوها صعيب؟

و كان بوها ما يخليهاش تمشي تقرا غدوة؟

آية تبكي و تقلّو يا بابا سامحني..

بوها اللي شاف شرفو تمس.. ما سامحش.

آية.. شعلت..

آية.. عدّات أيامات في السبيطار تحارب باش تعيش..

آية طفات..

آية ماتت.. أما حكايتها ما لازمهاش تموت.